نهايه وبدايه كلمات أندرو فرج

نهايه وبدايه

قلم ومحايه ونقطه
ومن أول السطر
سنه تنتهي ومن العمر تمر
زي مرور الشمس علي كل قُطر
تدفي جسم هزيل في النهار
وتهرب بعد مرور العصر
قلم ومحايه ونقطه
وأكتب من أول السطر

سنه من العمر تمر
تبدأ بداية رحلة عمر
وقبل طلوع الفجر
تجمع أهل وأحباب
وأغراب كله عليها يمر
تفرق أحباب وتجمع أغراب
وتشرد أصحاب وتسقي
الكل كاس المر
أتجمعوا وركبوا القَطر
في محطاته نزل كتير
وأتبقي القليل ومين
كمل معاك في قطار العمر
قلم ومحايه ونقطه
وأكتب من أول السطر
كتب القلم البدايه
رسم أجمل قصه
وألف أحلي روايه
ونسي يمهد للنهايه
وعاش جوا الحكايه
وكل يوم يغلط يشطب
ويرجع يكمل الحكايه
وماعرفش انه بشطبه
بيضيع جمال الروايه
قلم ومحايه ونقطه
وأكتب من أول السطر
شطب كتير ونسي المحايه
عاش وشاف الملامه
والغدر قدامه علامه
سنه اتكسر جات عليه الملامه
ضاع جمال خطه وماعرفتش
تظهره البرايه
وماعرفش يكمل عمل نقطه
ورجع تاني من البدايه
تاه وسط زحام الشخابيط
أفتكر المحايه
قعد يمحي ما عرفش يرجع
بياض الأيام زي البدايه
قلم ومحايه ونقطه
وأكتب من أول السطر
تاه القلم وسنه مكسور
طالع مع أول شعاع النور
يراجع ماضي يراجع أيام
ويعيد الشهور
بينهم يعرج بقلبه المكسور
لقي عينه يبعد عنها النور
وعدي عليه العصر
الشمس غربت وعدي
عليه قطار العمر
قلم ومحايه ونقطه
وأبدأ من أول السطر
سنه عدت سنه هلت
وبدأ أول أيام الشهر
الدنيا جداولها زي
جداول النهر
مره عاليه مره نازله
مره ساكنه سكون النهر
سنه وعددها اتناشر شهر
أرجع يا قلم أكتب من بداية
رواية العمر
أرسم حياتنا حديقه علي نهر
تزينها الورود وتسكنها
طيور الوروار
ونسعد قبل هروب الشمس
ويمر علينا الدهر
قلم ومحايه ونقطه
ومن أول السطر
كلمات أندرو فرج
عاشق نيلها
ت 1/1/2019